Basler Bebbi Jungi Garde
Dr Waansinn im Kinderzimmer
S isch jeedes Joor der gliichi Saich
Alli finde s biirewaich
Doch kurz vor Wienacht sinn si doo
Und d Finger loosch denn nit dervoo
Die hirnlos gschteerte Schpiilzyyg Sache
Wo ainzig d Portemonnaie läär mache
Sie fluete wie verruggt der Määrt
Und jeede weiss si sinn nit Wäärt
Und jeedi Mueter wird auch waich
Und sait, hejo denn kauf dää Saich
Ob JOJO oder Pokemon Karte
Uff der näggschti Grimpel muesch kum warte
Wenn der Summer isch verbi
Schtellsch di bald uff d Wienacht ii
Wintsched uns e Fasnachtsbatze
Vom Unggle mit der grosse Glatze
Schliesslig sinn mir Wältkultur
Spiile d Märsch nur no in Dur
Mir dien drummle und au pfyffe
Das duet jeedes Kind begriffe.
Spale Clique 1927 Jungi Garde 1948
Inseggte (fr)ässe - kasch vergässe!
Dr Agga Ugga isch lyyslig am flueche,
wel er mues Inseggte sueche.
Dä Staizyt-Bueb wett eender jaage,
als ständig an gruusige Kääferli z gnaage.
Sy Brueder dr Oggo seet daas nit glyych,
äär hets no gäärn das Grabbelviich.
Hit losst sich aifach nyt Gscheits finde,
nit emool in dooter Boorge-Rinde...
Doch deert, under em Stai, het sich eppis beweggt,
stellt äär fescht und hofft uff e Inseggt.
Numme nit scho wider e giftige Skorpioon,
in kaim Verhältnis steen dert Uffwand und Loon!
S Karma stoot em nit im Wääg,
öppenemool gits zem Gligg soo Dääg,
wel unerem Stai im hinderschte Egge,
brobiert e Kääfer sich z verstegge!
Gnau dää gits hit am Mittagsdisch,
sy Brueder bringt e frische Fisch
und d Mamme brutzlet faissi Maade,
das git zem jaage zwäägi Waade!
Nääbe Fricht mit vyyle Wytamyyn,
liifere d Grabbeldierli d Broteyyn!
Breo-Clique Ableeger 1974
Mir sin die Bööse
Zerscht will y mit Noochdrugg bedoone:
Schwinge ghöört zu de Traditione
Bevor mer «Rufst Du mein Vaterland» gsunge
Hänn unsere Vorfaare scho uff em Rütli gschwunge
Die Feschtstellig isch für d Fründ vo äne vom Rhy
Drmit sy's mergge - mögligscht gly
Das Wüsse isc so öbbis iwe nä gaischtige Loon
Für unseri Gescht us em grosse Kanton
Scho wo dr Täll dr Gessler verschosse
Hän d'Innerschwyzer Aidgenosse
Um dr Übermuet vo ire Buebe z dämpfe
Sy vor dr Hütte uff em Misch lo kämpfe
Drmit d Demokratie z Basel duet glinge
Die mer drummle, pfyffe und schwinge
Drmit me jung und fröhlig läbt
Isch Schwinge s BREO Gheimrezäpft
Jedefalls sin mer nümme erschreggt
Wenn d Nase emoll im Sägmähl steggt
Villicht sin mer höggschtens none bitzeli muff
Denn dien mer ys schüttle und stöön wieder uff
Mer gäng em Gegner d Hand und lache:
S näggscht Moll wämmer's besser mache
Vereinigte Kleinbasler 1884 Binggis
Helikopter Eltere - allewyyl doo, wenn me si (nit) bruucht
Esoo dänggt mänggi Mamme froh,
kuum isch daas Buschi ändlig doo,
und duet in ihrer Mueterrolle,
däm Kindli Zyt und Liebi zolle.
Am Aafang gits e Huffe z längge,
well Buschi nit sehr viel dien dängge,
und wenns au syydig isch, das Kind,
s isch nit vyl dinne, in sim Grind:
Nur ässe, dringge, ummebrülle,
ei Windle nach dr andre fülle,
und wie sy Babbe dänggts au öbbe,
ans liebe Mammi, und an Schööbe.
Vom Drummleniebe wird sichs drugge,
und gooht statt desse in e Gugge,
zum leehre wie me schränzt statt pfyfft,
und bsoffe um schiefi Egge schlyfft.
Derzue non e paar schlächti Fründe,
denn wirds statt gly e Firma z gründe,
s Talänt verschwände, und sy Wille
bi schlächtem Root, in dr Knille.
Denn entwigglet sich d Karriere,
schnäll in Richtig Strosse keehre,
dorum wirds au nie ganz wichtig,
und Mitglid bi dr Alte Richtig.
Esoo längts denn halt finanziell,
nur ab und zue für d Nootschloofstell,
wos, elai und druurig jetzt,
sich ai Schuss nach em andre setzt,
bis es sich wird infiziere,
und an Aidskräbs muess krepiere!
Und all daas, daas isch s Schlimme dra,
passiert, well ych nit uffbasst haa,
ermahnt sy sich, und sait sich gly,
ych muess die wältbescht Mamme sy!
Schliesslig liggts in myne Händ,
bikunnt die Gschicht e Happy Änd,
und smuess perfäggt si, offekundig,
daas bin ych mym Buschi schuldig!»
Naarebaschi 78 Binggis
Emoji statt ABC!!
S ABC, das isch doch glaar,
leert jeedes Kind in dr Primar.
Mechtsch in dr Schuel nit sitze blyybe,
yebsch s ABC und scho kasch Schryybe.
Zerscht vo Hand, so will s d Kultur,
speeter uff dr Taschtatur.
Und schnäll merggsch, s ABC verwänd y,
au dääglig uff em smarte Handy.
S git d SMS und das isch woor,
hitt scho sytt 25 Joor.
Uf Whatsapp und bim twittere,
losch schnälli Düüme zittere.
Im Chat, statt «Sali mitenand»,
schiggsch numme no die winggend Hand.
Statt «find y luschtig», s isch z erwääne,
schiggsch s lachend Smiley mit de Drääne.
Statt «find y guet, das muess y looobe»,
schiggsch dr Duume, dä nach oobe.
Hesch ebbis nit so bsunders gefunde,
andere Duume, dä nach unde.
Statt «Wiehnacht» schiggsch dr Santiglaus.
Zem Dangg schiggsch s Glatsche als Applaus.
Statt «Guet Nacht» schiggsch uss em Bett,
S schloofend Smiley und drey zzz...
Stadt «Sch...» z schryybe, schiggsch villicht,
s luschtig, bruune Gaggi-Gsicht.
Fascht jeedes Wort, s isch wunderbar,
findsch im Emoji-Repertoire.
Hammer, Katz und Dootekopf,
Spaghetti, Taxi, Anggezopf.
Härz, Kamel und Drottinett,
Flugi, Cowboy, Doppelbett.
Alles findsch es isch nit glooge,
vo Unicorn bis Räägebooge.
S fäält nur no, doch au das wird ko,
e Drummle und e Piccolo!
Rätz-Clique 1923 Jungi Garde
Dänggsch no, oder guuglisch scho?
S isch jetzt an der Zyt emool z verzelle:
Waas het men aigetlig mit Google welle?
S het Mentsche, die finde Google e Wucht,
bi andere fiehrt daas sofort zer Sucht.
Als Süchtli muesch nie lang glaage,
scho ligsch bim Doggter uff em Schraage
zem joomere, phantasiere und liege,
und s Resuldaat: Är duet en IV verfiege.
Aber daas isch aigetlig jo wurscht,
der Aadriib kunnt vom Wissensdurscht.
Google am Moorge, google z Midaag,
google am Oobe und underem Daag,
google wenn s basst, oder au nit,
googlen elai, ze zwait oder ze dritt,
google fir alles, me waiss wie s goht,
au wenn d Ergäbnis niemer verstoht.
Losst aim s Internet emool lo hängge,
muess me bletzlig wider afoo dängge,
den wäärde Biecher wider wichtig
und lääse zuenere Verpflichtig.
Me muess, und daas isch s bsunders Iible,
sich bletterwys dur d Sytte griible
bis me z hinderscht hinden unde,
waas me gsuecht het ändlig gfunde.
Und macht dy daas verruggt, das Sueche,
nitzt's nyt, duesch vor dy ane flueche,
im Netz bewegt sich nyt, daas stoot,
denn waartsch, bis Google wider goot.